• dc3bw

SAGA FLUGFREYJUFÉLAGS ÍSLANDS

Flugfreyjufélag Íslands var stofnað 30. desember 1954. Stofnendur voru 15 starfandi flugfreyjur hjá Loftleiðum og Flugfélagi Íslands. Brýnt þótti að standa vörð um hagsmunamál flugfreyja, en sá var tilgangurinn með stofnun sameiginlegs félags. Á stofnfundinum voru lög hins nýja félags samþykkt og kosin stjórn.
Hið nýja félag hlaut nafnið Flugfreyjufélag Íslands – FFÍ . Árgjald var 50.00 kr, greitt fyrirfram, og fyrsti formaður FFÍ var Andrea Þorleifsdóttir.
Fyrstu verkefni stjórnarinnar voru að gera kjarasamninga við flugfélögin, en til hliðsjónar var hafður samningur frá erlendu flugfélagi. Jafnframt var stjórninni falið að athuga aðild að Alþýðusambandi Íslands. Þann 7. janúar 1955 undirritaði Flugfreyjufélag Íslands sinn fyrsta kjarasamning.
Á þeim 58 árum sem liðin eru frá gerð þess samnings hafa baráttumál félagsins verið mörg og mikið breyst. Í fyrstu þótti sjálfsagt að flugfreyjur hættu störfum við 30 ára aldur eða ef þær giftu sig, en það átti síðar eftir að breytast enda sjálfsögð mannréttindi.

Flugfreyjur fengu flugpeninga til jafns við flugmenn en það var 1 króna og 50 aurar á tímann. Í löngum Ameríkuferðum fengu þær kojur til að hvílast í og þær hættu að þurfa að sitja á klósettunum í flugtaki og lendingu. Síðar var hámarksaldur hækkaður og meðal annars var samið um barneignarleyfi.
Mörg önnur réttlætismál og betri kjör hafa fengist með gerð kjarasamninga og í dag getur Flugfreyjufélag Íslands státað af, að vera brautryðjandi annarra stéttarfélaga á Íslandi til að semja við atvinnurekanda um sveigjanleg starfslok og stofna séreignasjóð til að gera félagsmönnum kleift að láta af störfum við 63 ára aldur.
Að þjónusta ferðalanga í farþegarými flugvéla hefur löngum verið það starf sem flugfreyjur og flugþjónar hafa verið kennd við. En á bak við þá ímynd er hin raunverulega ástæða þess að allt frá upphafi farþegaflugs ( 1930 ) var farið að hafa flugfreyjur og flugþjóna um borð í flugvélum til að gæta öryggis farþega.
Innan Flugfreyjufélags Íslands eru m.a. starfandi öryggisnefnd og vinnuverndarráð sem hafa eftirlit með því að öryggi, aðbúnaður og hollustuhættir um borð í flugvélum fullnægi settum kröfum.
Í dag eru félagsmenn FFÍ rúmlega 700. Þeir starfa hjá Icelandair, Flugfélagi Íslands og Wow air.
Félagið er með skrifstofu í Hlíðasmára 15 Kópavogi.
Auk aðildar að Alþýðusambandi Íslands er FFÍ aðili að Norræna Flutningaverkamannasambandinu – NTF og Evrópska Flutningamannasambandinu - ETF.

Stefna FFÍ

Stefnu Flugfreyjufélags Íslands má draga saman líkt og eftirfarandi:

Stéttarfélaginu ber að vinna markvisst að því að bæta kjör, hag og vellíðan f/f í starfi, ásamt því að standa vörð um núverandi kjör og að kjarasamningi sé fylgt. Aukinheldur skal vinna markvisst að því að efla stéttarfélagið og bæta starfssemi þess.

Að öðru leyti er vísað til laga félagsins:

2. gr. Tilgangur félagsins er:

a) Að sameina alla starfandi flugfreyjur og flugþjóna sem starfa á félagssvæðinu

b) Að vinna að sameiginlegum hagsmunamálum félagsmanna, svo sem með því að semja um kaup og kjör, bættan aðbúnað við vinnu og gæta þess að ekki sé gengið á rétt félagsmanna.

c) Að vinna að öryggismálum og öðru því sem tengist starfi félagsmanna.

d) Að fylgjast með þróun starfsins og öryggisþáttum tengdu því hjá öðrum flugfélögum innlendum sem erlendum, og vinna að því að kjör félagsmanna séu ekki lakari en hjá þeim.

Flugfreyjufélag Íslands

ffi birdThe Icelandic Cabin Crew Association.

Flugfreyjufélag Íslands er eina stéttarfélag flugfreyja og flugþjóna á Íslandi.
Flugfreyjur og flugþjónar Air Iceland Connect, Icelandair og Wow air eru öll félagar í Flugfreyjufélagi Íslands.
Félagsmenn eru 1095 en rúmlega 1800 manns yfir sumartímann.
Skrifstofa FFÍ er að Hlíðasmára 15 Kópavogi og er opin alla virka daga frá 10 til 14.
Sími skrifstofu er 561 4307 og netfangið This email address is being protected from spambots. You need JavaScript enabled to view it.
Allar nánari upplýsingar um símanúmer og netföng stjórnar og trúnaðarráðs eru að finna undir viðkomandi hlekkjum.